Muqdisho – Hay’adda caalamiga ah ee International Press Institute (IPI) ayaa walaac ka muujisay xaaladda xorriyadda saxaafadda ee Soomaaliya, iyadoo sheegtay in saxafiyiintu ay weli wajahaan caqabado badan oo ay ka mid yihiin weerarro, xarigyo iyo caburin.
IPI waxay sheegtay in xaaladda saxaafaddu ay sii adkaanaysay bilihii la soo dhaafay, gaar ahaan xilli dalka uu ku jiro marxalad siyaasadeed oo xasaasi ah, isla markaana ay socdaan doodaha la xiriira doorashooyinka, maamulka dalka iyo dimuqraadiyadda.
Hay’addu waxay xustay in warbaahinta madax-bannaan ay door muhiim ah ka ciyaarto la xisaabtanka masuuliyiinta, wacyigelinta bulshada iyo gaarsiinta xogta saxda ah ee ay dadku u baahan yihiin.
Sidoo kale, IPI waxay sheegtay inay la shaqaynayso hay’adaha maxalliga ah iyo kuwa caalamiga ah si loo taageero saxafiyiinta Soomaaliyeed, loona xoojiyo xorriyadda hadalka iyo tan warbaahinta.
Warbixinta ayaa tilmaantay in qaar ka mid ah saxafiyiinta ay la kulmaan handadaad iyo cadaadis sabab la xiriira wararka ay tabiyaan. IPI waxay ka digtay in arrimahaas ay dhaawici karaan xorriyadda warbaahinta iyo xaqa ay bulshada u leedahay helitaanka xog sugan.
Hay’addu waxay ugu baaqday dowladda Soomaaliya inay qaaddo tallaabooyin degdeg ah oo lagu ilaalinayo saxafiyiinta, isla markaana la hubiyo in caddaalad la marsiiyo dadka lagu eedeeyo weerarrada iyo tacaddiyada ka dhanka ah warbaahinta.
Dhanka kale, IPI waxay beesha caalamka iyo saaxiibbada Soomaaliya ugu baaqday inay kordhiyaan taageerada lagu horumarinayo xorriyadda saxaafadda iyo badbaadada saxafiyiinta Soomaaliyeed.
Hay’addu waxay sheegtay in warbaahin xor ah oo madax-bannaan ay tahay tiir muhiim u ah dimuqraadiyadda, horumarka iyo dowlad wanaagga.
